Það var sannkallað heppniskvöld hjá einum spilara síðastliðið laugardagskvöld þegar þrefaldur Lottópottur skilaði honum ríflega 45 milljóna króna fyrsta vinningi. Vinningsmiðinn, sem kostaði aðeins 900 krónur, var keyptur í Happahúsinu í Kringlunni.
Þegar hann sá síðastliðinn sunnudag að fyrsti vinningur hafði gengið út, ákvað hann að renna yfir miðann sinn og þá blasti sannleikurinn við.
„Ég ætlaði alls ekki að trúa þessu,“ segir vinningshafinn og hlær. Fyrsta sem hann gerði var að segja konunni sinni gleðifréttirnar, en hún var ekki síður vantrúuð: „Við horfðum bæði á hvort annað og hugsuðum að þetta væri nú örugglega rangt.“
Hann viðurkennir að svefninn um nóttina hafi verið nánast enginn. „Ég er eiginlega enn að reyna að átta mig, þetta er ólýsanleg tilfinning,“ segir hann og bætir við að gleðin hafi verið yfirþyrmandi.
Hjónin eru þó ekki alveg sammála um hvað eigi að gera fyrst.
Konuna dreymir um nýtt parket en hann horfir frekar til þess að slaka aðeins á og njóta þess að vera orðinn nýbakaður lottómilljónamæringur.
Starfsfólk Íslenskrar getspár óskar vinningshafanum innilega til hamingju og þakkar um leið veittan stuðning sem skiptir gríðarlega miklu máli fyrir fatlað fólk, sem og íþrótta- og ungmennafélög um land allt sem njóta góðs af sölu Lottó.
